Í mörgum bæjum hér í Sviss, má finna leikfangasöfn (ludothèque) sem virka nákvæmlega eins og bókasöfn – nema þau lána leikföng og spil í stað bóka. Söfnin, sem gjarnan eru rekin af sveitarfélögunum, eru opin nokkra klukkutíma í senn, einu sinni til þrisvar í viku. Þá getur maður komið bæði til að leika með leikföngin og spilin á staðnum og líka til að fá þau lánuð heim í ca 10 daga. Sum leikfanganna eru keypt ný en mörg þeirra hafa verið gefin notuð til safnsins. Þessi þjónusta ýtir svo sannarlega undir endurnýtingu og kemur í veg fyrir að barnaherbergi troðfyllist af ónotuðum leikföngum. Við förum þó nokkuð oft á safnið í okkar bæ, Coppet, bæði til að leika og fá lánað 🙂
Er ekki tilvalið að opna samskonar söfn út um allt á Íslandi?
Getur þú beitt þér fyrir því að það verði gert í þínum heimabæ?…
… gæti starfsemin mögulega tengst rekstri bókasafnsins sem er þegar á staðnum? Gætu eldri borgarar, Kvenfélagið, Lionsklúbburinn eða aðrir samskonar hópar komið að málinu?…
Leikfangasafn: Útlán á leikföngum og spilum
