Lítið, ómerkilegt plastherðatré (?) fylgdi okkur óvart heim við fatainnkaup um daginn. Í það hefur verið eytt góðu magni af olíu, orku og öðrum hráefnum bæði við framleiðslu þess og flutning í búðina, þar sem það hékk þegar það kom óvænt inn í líf okkar. Við sáum engin not fyrir það heima fyrir. Tveir kostir voru því í stöðunni: #1) Henda því í ruslið með tilheyrandi sóun á auðlindum og auknu sorpmagni, eða #2) Gefa blessuðu herðatrénu framhaldslíf með því skila því aftur í verslunina, næst þegar við áttum leið þar hjá. Þessi mynd var tekin þegar valkosti #2) var hrint í framkvæmd.

Allir eru sáttir:
– Við (með því að koma í veg fyrir sóun og óþarfa sorpmyndun heima hjá okkur).
– Verslunin (hún þarf ekki að eyða peningum í nýtt herðatré).
– Umhverfið (það þarf ekki að skaffa hráefni og orku í nýtt herðatré – og þola tilheyrandi mengun).
– Herðatréð (það fær að halda áfram að koma að góðum notum með sínu hangsandi framhaldsletilífi).

Þetta litla plastherðatré er kannski ekki svo ómerkilegt eftir allt saman? Hver einasti hlutur skiptir máli!

Minni sóun